Masallıda kartof əkini ilə məşğul olan fermerlər məhsulun satışı ilə bağlı problemlə üzləşiblər. Bu haqda məlumatı Cenublu.az bu gün, 23 iyun tarixində Azərtac-a istinadən verir.
Rayonun Təklə, Ləngan, Əhmədli və bu kəndlərə yaxın ərazilərindəki fermerlər məhsulun hazırkı qiymətindən və saxlanma anbarlarının olmamasından gileylənirlər.
Kiçik və Orta Biznesin İnkişafı Agentliyi (KOBİA) məsələyə münasibət bildirib. KOBİA-nın əməkdaşları rayonun ən çox, 150 hektar sahədə kartof yetişdirən Böyük Təklə kəndinin fermerləri ilə görüşüb, problemlə yerində tanış olublar.
“KOBİA tərəfindən məhsul satışına dəstək göstərən qurumlar barədə fermerlərə məlumat verilib və sahibkarlar aidiyyəti qurumlarla əlaqələndiriliblər. Həmçinin fermerlər Masallı rayonunda fəaliyyət göstərən bir neçə saxlama anbarı olan sahibkarlarla əlaqələndiriliblər. Bununla belə, Təklə kəndində fermerlər tərəfindən istehsal edilən məhsulların saxlanması üçün anbarın olmaması nəzərə alınaraq, saxlama anbarlarının tikintisi və idarə edilməsi ilə məşğul olan sahibkarlıq subyektləri, eləcə də aidiyyəti qurumlar bu məsələ barədə KOBİA tərəfindən məlumatlandırılmışdır”, - deyə KOB dostu departamentinin müdir müavini Eldəniz Əmirov söyləyib.
