Astarada məktəb direktoru bıçaqlanıb.
Cenublu.az-ın əldə etdiyi məlumata görə, hadisənin istintaqı Astara Rayon Məhkəməsində keçirilib.
Belə ki, təqsirləndirilən 1964-cü il təvəllüdlü Bəhruz Qarayev (ad şərtidir) ötən ilin sentyabr ayında Astara şəhərində gözətçi işlədiyi məktəbin direktoruna hücum edib. Buna səbəb məktəb direktoru Aysel Əzimovanın (ad şərtidir) onun arvadı, bir zamanlar məktəbdə katibə işləyən Sevincə (ad şərtidir) aid çılpaq video-görüntüləri paylaşması olub. Ayseldən arvadına aid görüntüləri tələb etdikdə onun ünvanına nalayiq ifadələr işlədib, bıçaqla ona iki zərbə vurub.
Bəhruz Qarayev Azərbaycan Respublikası CM-nin 221.3-cü maddəsi ilə təqsirləndirilib.
Məhkəmədə Bəhruz Qarayev hadisədə özünü təqsirli bilib:
“Artıq 25 ildir ki, orta məktəbdə gözətçi işləyirəm. Aysel həmin məktəbin direktorudur. Yoldaşım Sevinc isə məktəbdə katibə işləyirdi. Sevinc Ayselin qanunsuz hərəkətlərini gördükdə prokurorluğa şikayət etdi. Bundan sonra bizə qarşı ədavətə başladı.
Hətta arvadıma aid videogörüntüləri yaydı. Özüm görməsəm də, eşitdiyimə görə, guya həyat yoldaşım çılpaq videolarını bir nəfər oğlana göndərib, o da görüntüləri direktora verib.
Aysel həmin videoları məktəbdə və təhsil sektorunda müxtəlif şəxslərə göstərib, Sevincin şərəf və ləyaqətini alçaltmağa çalışıb. Bundan sonra həyat yoldaşım ərizə yazaraq işdən çıxdı. Ayselin hərəkətlərindən bezdiyimə görə onu cəzalandırmaq və qorxutmaq qərarına gəldim. Öldürmək fikrim yox idi, belə fikirdə olsaydım, çoxlu bıçaq zərbəsi edərdim”.
Daha sonra məhkəmədə zərərçəkmiş Aysel Əzimova ifadə verib:
“Sevinc direktoru olduğum məktəbdə katibə, əri Bəhruz isə gözətçi işləyib. Təxminən 2 il əvvəl Sevinc yaxınlaşaraq məktəbdə olan vakant iş yerinə oğlu Samiri texniki işçi kimi qəbul etdirmək istədi. Mən isə həmin yerə Vətən müharibəsi qazisinin həyat yoldaşını götürdüm. Bundan sonra mənimlə ədavətə başladı, prokurorluq orqanlarına haqqımda böhtan xarakterli məlumatlar verdi.
Ötən ilin fevral ayında Sevincin çılpaq videoları yayıldı. Videoları məktəbdə müəllim və işçilərdən də görən olmuşdu. Görüntülər haqqında qadından soruşanda ona məxsus olmadığını, montaj edildiyini dedi. Bu hadisə məktəbin kollektivi arasında qınağa səbəb olduğundan işçilər iclas keçirdi və Sevinci işdən çıxarmağı təklif etdilər. O, bunu eşitdikdə özü ərizə yazaraq işdən çıxdı.
Hadisə günü isə seçkidə iştirak üçün məktəbə gəldim. Bəhruz həyatda üzərimə qaçanda qışqırmağa başladım. Özümü müdafiə etməyimə baxmayaraq bıçaqla bir neçə dəfə xəsarət yetirdi”.
Sonda məhkəmənin qərarı ilə Bəhruz Qarayev 2 il 6 ay azadlıqdan məhrum edilib.
Fidan İlqar
