Lənkəranda döyülən ikinci yeniyetmə, yəni Rəsilə Əliyevanın doğma qızının vəziyyəti ağırdır. Bununla bağlı Azərbaycan Uşaqlar Birliyinin rəhbəri Kəmalə Ağazadə Bizim.media-ya açıqlama verib.
Kəmalə Ağazadə Ailə, Qadın və Uşaq Problemləri üzrə Dövlət Komitəsinə çağırış edərək yeniyetmənin reabilitasiyaya cəlb olunmasını tələb edib: “Burada ikinci bir yeniyetmənin taleyindən də söhbət gedir. Məktəb direktoru da təsdiqlədi ki, Rasilə Əliyeva öz qızını daha betər döyüb. O qızın özü də hazırda çox ağır durumdadır. Artıq onda da psixoloji problemlər formalaşıb. Eyni zamanda özünün günah hissi formalaşır. Halbuki onun heç bir günahı yoxdur. Həmin yeniyetmə ilə bağlı qısa müddətdə reablitasiya işi aparılmalıdır. Hesab edirəm ki, Ailə, Qadın və Uşaq Problemləri üzrə Dövlət Komitəsi Lənkəran şəhər İcra Hakimiyyəti qarşısında məsələ qaldırmalıdır. Bu işə komitə mütləq müdaxilə etməlidir və uşağa psixoloji dəstək göstərməliyik. Ana olsa belə, uşağa göstərdiyi şiddətə görə cavab verməlidir”.
Qeyd edək ki, 14 iyul tarixində qızının sinif yoldaşını, 4 saylı məktəbin 9-cu sinif şagirdini döyən icra başçısının sabiq müavini Rəsilə Əliyeva barəsində cinayət işi açılıb.
