Astara rayonunun sərhədyanı Qapıçıməhəllə və Vəznəş kəndləri bu il bir neçə qanunsuz sərhəd keçidi faktının qeydə alındığı ərazilər olub. Məlumata görə, Əfqanıstan vətəndaşları olan bir qrup şəxs İran ərazisindən məhz bu kəndlərin istiqamətindən Azərbaycan sərhədini keçməyə cəhd ediblər.
Aprelin 30-da 1999-cu və 2005-ci il təvəllüdlü iki Əfqanıstan vətəndaşı Qapıçıməhəllə kəndi tərəfdən dövlət sərhədini qanunsuz keçiblər. Sentyabrın 19-da isə 2003-cü il təvəllüdlü digər bir şəxs sərhədi Vəznəş kəndi istiqamətindən pozub.
Hər üç nəfər Dövlət Sərhəd Xidmətinin əməkdaşları tərəfindən aşkar edilərək saxlanılıb. Astara Rayon Məhkəməsinin qərarına əsasən, Qapıçıməhəllə istiqamətindən keçən iki şəxs Cinayət Məcəlləsinin 318.2-ci maddəsi ilə iki il müddətinə, Vəznəş tərəfdən sərhədi pozan şəxs isə 10 ay müddətinə azadlıqdan məhrum edilib.
Məhkəmə qərarına görə, onların cəzaları başa çatdıqdan sonra Azərbaycan Respublikasının ərazisindən məcburi qaydada çıxarılması nəzərdə tutulur.
