İranda cəsusluqda ittiham olunan Fərid Səfərlinin məhkəməsi bitmək üzrədir. Bu haqda məlumatı Cenublu.az bu gün, 27 iyun tarixində Güney AZfront Telegram kanalına istinadən verir.
Fəridin anası Dilarə Əsgərova bildirib ki, oğluna qarşı irəli sürülən ittiham əsassızdır.
“Fərid dedi ki, məhkəmə prosesi yekunlaşmaq üzrədir. Lakin nə məhkəmədə, nə də istintaqda onun casusluq etməsi ilə bağlı bir dənə də olsun fakt ortaya qoyulmayıb. Fəridin sözlərinə görə, İrana getməsinə səbəb olan qız və ailəsi də onun əleyhinə ifadə verməyiblər. Lakin İran tərəfi Fəridin bir neçə dil bilməsi və Avropada təhsil almasına görə şübhələnir, onu casusluqda ittiham edir”.
Qeyd edək ki, Almaniyanın Yena Universitetinin tələbəsi, 27 yaşlı əslən Masallının Şərəfə kəndindən olan Fərid Səfərli 20 fevral tarixində həmin universitetdə təcrübə keçən həkim rəfiqəsinə baş çəkmək üçün Tehrana gedib. Lakin martın 4-dən onunla telefon əlaqəsi tamamilə kəsilib.
Məsələ ilə bağlı Azərbaycan Xarici İşlər Nazirliyi İrana nota verib. İran tərəfi notaya cavab olaraq, Fərid Səfərlinin həbs olunduğunu, ona qarşı cinayət işi başladıldığını bildirib.
