Astara rayonunun Rüdəkənar kəndində kirayə yaşadığı evdə həyatına qəsd edən gömrük işçisi Əli Cahangirlinin həyatı və ölümünün son günü ilə bağlı bəzi təfərrüatlar məlum olub. Bu haqda məlumatı Cenublu.az bu gün, 14 iyul tarixində Bakupost-a istinadən xəbər verir.
Belə ki, Əli Nəcəfalı oğlu Cahangirli 1986-cı ildə Naxçıvanın Babək rayonunun Nehrəm kəndində məşhur tarixçi, Nehrəm Xeyriyyə Cəmiyyətinin İdarə Heyətinin və BAO Mərkəzi Şurasının üzvü Nəcəfalı Cahangirlinin evində anadan olub. O, 12 ildir ki, gömrük sistemində çalışıb. Ailəli idi, üç azyaşlı oğlu olub.
Ölümündən 1 gün öncə işdən sonra dostları ilə birgə olub. Məclis boyu o, həvəsdən düşdüyünü, həyatdan bezdiyini bir neçə dəfə söyləyib. Məclis bitdikdə həmişə istifadə etdiyi taksini çağıraraq evinə yola düşüb. Evdə heç kim olmadığından və müştərini depressiv əhvali-ruhiyyədə görən taksi sürücüsü onunla qalıb. Səhərə kimi yemək süfrəsi arxasında söhbət ediblər. Sürücü onu özünə qəsd etmək firkindən daşındırmağa çalışıb. Səhər saat 08:00 radələrində taksi sürücüsü evinə qayıdıb. Hadisə də elə bundan sonra baş verib.
Əli Cahangirlinin hansı səbəbdən depressiyaya düşdüyü məlum deyil. Dostlarının və iş yoldaşlarının sözlərinə görə, o, deyib-gülən, şən biri olub və işdə heç bir problemi olmayıb.
Faktla bağlı Astara rayon prokurorluğunda araşdırma aparılır.
Qeyd edək ki, mayor Əli Cahangirli Dövlət Gömrük Komitəsinin (DGK) Cənub Ərazi Baş Gömrük idarəsinin mobil gömrük şöbəsinin rəis müavini idi.
Mərhum Naxçıvanın Nehrəm qəsəbə qəbristanlığında torpağa tapşırılacaq.
