İki azyaşlı övladı ilə intihara cəhd edən keçmiş Astara rayon İcra Hakimiyyətinin aparıcı məsləhətçisinin həyat yoldaşı və ailəsi haqda bəzi faktlar üzə çıxıb. Bu haqda məlumatı Cenublu.az bu gün, 20 iyul tarixində Oxu.az-a istinadən verir.
Məlumata əsasən, intihara cəhd edən Aytən Abbasova daha öncə də bu əmələ əl atıb, lakin qonşular ona mane ola biliblər. Səbəb isə qayınanası ilə yola getməməsi imiş. Hadisə baş verən gün Aytən yenə qayınanası ilə mübahisə edirmiş. Səs-küyə yaşadığı binanın mühafizə xidmətinin əməkdaşları gəlsələr də, qapını onların üzünə açan olmayıb. Şahidlərin sözlərinə görə, mübahisəyə səbəb Aytənin qayınanasının ad gününü təbrik etməməsi olub.
Faktla bağlı Yasamal Rayon Prokurorluğunda Cinayət Məcəlləsinin 125-ci (Özünü öldürmə həddinə çatdırma) maddəsi ilə cinayət işi açılıb.
Qeyd edək ki, Aytən Abbasova özünü iki azyaşlı övladı ilə birgə yaşadığı Yeni Yasamal kompleksində 5-ci mərtəbədən atıb. Onun 3 yaşlı qızı Sara Abbasova dünyasını dəyişib. Digər qızı, 4 yaşlı Sofiya Abbasova isə qolunda və budunda sınıqlarla Kliniki Tibbi Mərkəzə yerləşdirilib. 25 yaşlı Aytən Abbasovanın vəziyyəti ağır qiymətləndirilir.
Onun həyat yoldaşı Suslan Abbasov Astara RİH-də işləyib və onlar ailəlikcə rayonun Şiyəkəran kəndində yaşayıblar. Lakin işdən çıxdıqdan sonra o, Rusiyaya işləməyə gedib, ailəsi isə Bakıya köçüb.
