Daha öncə xəbər verdiyimiz kimi, Lənkəran şəhəri, Həzi Aslanov küçəsində dayanacağın yarısının ticarət obyektinə çevrilməsi sakinlər tərəfindən birmənalı qarşılanmayıb.
Məsələ ilə bağlı Lənkəran İcra Hakimiyyətindən Bizim.Media-ya rəsmi açıqlama verilib.
Bildirilib ki, Həzi Aslanov küçəsindəki sovet dönəmindən qalan köhnə, yöndəmsiz, ətrafı açıq olan dayanacaq yenisi ilə əvəzlənib:
“Qeyd edək ki, havanın küləkli və yağışlı vaxtlarında köhnə dayanacaq sakinlərimizin rahatlığı üçün əlverişsiz olduğu üçün və eləcə də vətəndaşlarımızın bu barədə müraciətləri nəzərə alınaraq daha müasiri ilə dəyişdirilib.
Yerli sahibkarın dəstəyi ilə quraşdırılan və müasir standartlara cavab verən yeni dayanacaq istər estetik görünüşü, istər keyfiyyəti, istərsə də rahatlığı baxımından sakinlərimizin ürəyincədir.
Bütün iqlim şəraitlərində sakinlərimizin dayanacaqdan rahat istifadəsi üçün zəruri şərait yaradılıb. Yeni dayanacaq daha da genişləndirilib və ona bitişik ərazidə ətrafdakı parklarda sakinlərin skuterdən istifadəsi üçün xidmət sahəsi yaradılıb”.
