Astara rayonunun Şiyəkəran kəndində həyat yoldaşını öldürən, onun anasına isə xəsarət yetirən şəxsin məhkəməsi başlayır. Bu haqda məlumatı Cenublu.az bu gün, 6 iyul tarixində Report.az-a istinadən verir.
Belə ki, 18 mart tarixində yaşadıqları evdə Astara rayonu, Şiyəkəran kənd sakinləri - 28 yaşlı Əfsanə Ramazanovanın öldürülməsi, onun anası, 53 yaşlı Sevda Ramazanovaya isə xəsarət yetirilməsi faktı üzrə rayon prokurorluğunda başlanmış cinayət işinin istintaqı tamamlanıb.
İstintaqla 32 yaşlı Fərmayil Əliyevin bıçaqla çoxsaylı xəsarətlər yetirməklə arvadı Əfsanə Ramazanovanı öldürməsi, bundan sonra qayınanası Sevda Ramazanovaya xəsarətlər yetirməklə öldürməyə cəhd etməsinə əsaslı şübhələr müəyyən edilib.
Fərmayil Əliyevə Cinayət Məcəlləsinin 120.2.4 (xüsusi amansızlıqla qəsdən adam öldürmə) və 29, 120.2.7-ci (iki şəxsi qəsdən öldürməyə cəhd) maddələri ilə ittiham elan edilib və barəsində məhkəmənin qərarı əsasında həbs qətimkan tədbiri seçilib.
Cinayət işi baxılması üçün aidiyyəti üzrə Lənkəran Ağır Cinayətlər Məhkəməsinə göndərilib.
