Astarada “Xəzər - dostluq dənizi” motoyürüş karvanı keçirilib. Bu haqda bu gün, 10 aprel tarixində Cenublu.az Astara RİH-yə istinadən xəbər verir.
Tədbir Rusiya Federasiyasının Həştərxan vilayətinin qubernatoru İqor Babuşkinin rəhbərliyi ilə baş tutub. Astara Rayon İcra Hakimiyyətinin başçısı Qəzənfər Ağayev Astara Dənizkənarı Park-Bulvar kompleksində motoyürüş iştirakçıları ilə görüşərək qonaqları salamlayıb.
Qubernator İqor Babuşkin Astaranın çox gözəl dənizkənarı bulvarı, təmiz havası və füsunkar təbiəti olduğundan danışıb. Bildirib ki, 1 aprel 2023-cü il tarixində Həştərxandan başlayan motoyürüş Qazaxıstan, Türkmənistan, İran və Azərbaycandan keçməklə 11 aprel 2023-cü ildə başa çatacaq. Layihənin əsas məqsədi Xəzəryanı ölkələr arasında dostluq və əməkdaşlıq əlaqələrinin möhkəmləndirilməsidir. “Məmnuniyyətlə bildirirəm ki, Azərbaycan xalqının ümummilli lideri Heydər Əliyevin yubiley tədbiri may ayında Həştərxan şəhərində də təntənəli şəkildə qeyd ediləcəkdir. Düşünürəm ki, hər birimiz bölgədə davamlı sülhün əldə edilməsindən ötrü bütün imkanlardan istifadə etməliyik”, - deyə qubernator bildirib.
Qonaqlar Azərbaycan Respublikası Gənclər və İdman Nazirliyinin əməkdaşlarının müşayiəti ilə Bakı şəhərinə yola düşüblər.
