Lənkəran rayonunun Girdəni kəndində yerləşən uşaq bağçası qəzalı vəziyyətdədir. Bu haqda məlumatı Cenublu.az bu gün, 21 iyun tarixində Baku TV-yə istinadən verir.
Sakinlər bildirirlər ki, kənddə əksər valideynlər mövcud problem səbəbindən övladlarını başqa bağçalara aparmaq məcburiyyətində qalırlar.
Onların sözlərinə görə, bağça binası artıq uşaqlar üçün təhlükəyə çevrilib:
“Binanın altı ilan, kərtənkələ, qırmızı əqrəblə doludur. Uşaqlar qapıya, pəncərəyə yaxınlaşa bilmirlər”.
Lənkəran-Astara Regional Təhsil İdarəsinin əməkdaşı Fəridə İsmayılova bildirib ki, Girdəni kənd uşaq bağçasının yerləşdiyi bina 1961-ci ildə tikilib, 1972-ci ildən bağça binası kimi fəaliyyət göstərir:
“Bu günə kimi bina əsaslı təmir olunmamışdır. Müvafiq qurumlar tərəfindən bağçaya baxış keçirilmiş və yaxın dövrdə yeni bağça binasının tikintisi məsələsi nəzərdə tutulmuşdur”.
Qeyd edək ki, bağçada əvvəllər 3 qrup üzrə 55 uşaq təlim-tərbiyə alıb. Bina qəzalı vəziyyətə düşəndən sonra isə hazırda bağçada cəmi 1 qrup üzrə 20 uşaq var.
