Həbsdə olan Müdafiə Nazirliyinin Maliyyə və Büdcə İdarəsinin biləsuvarlı sabiq rəisi, general-mayor Nizami Məmmədovun bacısı oğlu şantaj edilib.
Musavat.com xəbər verir ki, generalın Faiq adlı bacısı oğlu hazırda hərbi hissələrdən birində Maliyyə Xidməti rəisi vəzifəsində xidmət edir.
Onu şantaj edən isə tanışı İsmayıl adlı şəxs olub. Belə ki, İsmayıl generalın bacısı oğlundan dövlət qurumlarına şikayət edib. O, şikayətində göstərib ki, həbsdə olan generalın yeyinti və mənimsəmə işlərində Faiqin də əli olub.
Faiq bu şikayətlərin qarşısını almaq üçün bir neçə dəfə İsmayılla əlaqəyə keçib. Onlar ortaq tanışları vasitəsi ilə razılığa gəliblər.
Məlumata görə, İsmayıl şikayətləri dayandırmaq üçün Faiqdən 10 min manat istəyib. Sonra 6 min manata razılaşıblar. İsmayıl 3 min manatı alandan sonra həbs edilib.
Generalın bacısı oğlu yarıçılpaq fotoları ilə də şantaj edilib. Faiqin çimərlik geyimində olan fotoları İsmayılın mobil telefonunda aşkar olunub.
Xatırladaq ki, general Nizami Məmmədov külli miqdarda mənimsəmədə ittiham edilərək 11 il 6 ay müddətinə azadlıqdan məhrum edilib.
