Qadının evinə qanunsuz daxil olaraq ona qarşı əxlaqsızlıq edən şəxsə hökm oxunub.
Lənkəran Ağır Cinayətlər Məhkəməsində qadına qarşı seksual xarakterli zorakılıq hərəkətləri etməkdə və mənzil toxunulmazlığını pozmaqda təqsirləndirilən Qafar Elimdarzadənin cinayət işi üzrə məhkəmə prosesi başa çatıb.
İttihama əsasən, hadisə 18 iyun 2025-ci il tarixdə gecə saat 02 radələrində Saatlı rayonunda baş verib. Qafar Elimdarzadə öz cinsi ehtirasını təmin etmək məqsədilə əvvəllər heç bir yaxınlıq münasibətində olmadığı həmkəndlisinin evinə ev sakinlərinin iradəsinə zidd olaraq gizli şəkildə daxil olub.
Məlumata görə, o, əvvəlcə həyətyanı sahəyə, daha sonra qapısı açıq olan yaşayış evinə girərək zalda yatan qadına yaxınlaşıb. Zərərçəkmiş şəxs oyandıqdan sonra ona qarşı zor tətbiq edilib, yaşayış evində və həyətdə fiziki təsir göstərilib və sağlamlığa zərər vurmayan xəsarətlər yetirilib.
İstintaqla müəyyən edilib ki, bundan sonra qadının iradəsinə zidd olaraq ona qarşı seksual xarakterli zorakılıq hərəkətləri törədilib.
Təqsirləndirilən şəxs məhkəmədə özünü təqsirli bilməyib.
Hakim Cavanşir Nəbiyevin sədrliyi ilə keçirilən iclasda hökm elan olunub. Məhkəmənin qərarı ilə təqsirləndirilən şəxs 6 il 1 ay müddətinə azadlıqdan məhrum edilib.
Qeyd edək ki, ad və soyad şərtidir.
