Lənkəranda “Fövqəladə hallarda özünü necə aparmalı” və “Yanğın təhlükəsizliyi qaydalarına əməl etmək həyat fəaliyyətinin təhlükəsizliyinin qarantıdır” mövzusunda nəzəri-praktiki tədbir keçirilib. Bu haqda məlumatı Cenublu.az bu gün, 16 may tarixində verir.
FHN-in Cənub Regional Mərkəzinin təşkilatçılığı ilə keçirilən tədbir Lənkəran Peşə Liseyində baş tutub.
Görüşə FHN-in Cənub Regional Mərkəzinin, Dövlət Yanğın Nəzarəti Xidmətinin Cənub Regional Dövlət Yanğın Nəzarəti İdarəsinin, Dövlət Yanğından Mühafizə Xidmətinin Lənkəran Yanğından Mühafizə hissəsinin, Xüsusi Riskli Xilasetmə Xidmətinin “N” saylı hərbi hissənin, Lənkəran Rayon Təcili və Təxirəsalınmaz Tibbi Yardım Stansiyasının qüvvə və vasitələri cəlb edilib.
Tədbirin nəzəri hissəsində təbii və texnogen xarakterli fövqəladə hadisələr zamanı düzgün davranış, ilkin yanğınsöndürmə avadanlıqları və fərdi mühafizə vasitələrindən istifadə qaydaları, təxliyə barədə danışılıb, suallar cavablandırılıb.
Daha sonra praktiki hissə çərçivəsində tədbirə peşə liseyinin müəllim və şagird heyətinin “təhlükəli ərazidən” təxliyə edilməsi, onlara təxirəsalınmaz ilkin tibbi yardımın göstərilməsi, “yanğın” yerində çevik kəşfiyyatın aparılması, xilasetmə və “yanğının söndürülməsi” əməliyyatları həyata keçirilib.
