Ermənistan məhkəməsi azərbaycanlı əsir, əslən Lənkərandan olan Hüseyn Axundovu 20 il azadlıqdan məhrum edib. Bu haqda məlumatı Cenublu.az bu gün, 21 iyun tarixində verir.
O, Zəngəzur mis-molibden kombinatının gözətçisini “qətlə yetirməkdə təqsirləndirilib”.
Qeyd edək ki, aprel ayında Naxçıvan Muxtar Respublikasının Şahbuz rayonunun Ermənistanla sərhədboyu ərazisində əlverişsiz hava şəraitində məhdud görmə səbəbindən Azərbaycan ordusunun itkin düşmüş əsgərləri - 19 yaşlı Bəbirov Aqşin Qabil oğlu və 20 yaşlı Axundov Hüseyn Əhliman oğlu Ermənistan tərəfindən əsir götürülüblər.
Daha sonra azərbaycanlı hərbçilər “bir qrup şəxslə əvvəlcədən əlbir olaraq Ermənistanın dövlət sərhədini qanunsuz keçməkdə”, “qanunsuz odlu silah və döyüş sursatı daşımaqda” ittiham olunaraq barələrində həbs qərarı verilib. Bununla yanaşı, sonradan Hüseyn Axundov barəsində daha bir cinayət işi başlanılıb və o, “Zəngəzur mis-molibden kombinatının gözətçisini qətlə yetirməkdə” təqsirləndirilib.
8 may tarixində Aqşin Bəbirov barəsində hökm çıxarılıb və o, 11 il 6 ay müddətinə azadlıqdan məhrum edilib.
