Rəsilə Əliyevanın döydüyü iddia edilən 9-cu sinif şagirdi Aliyə Camalovanın ibtidai sinif müəllimi Gülzar Əliyeva məsələ ilə bağlı bu gün, 16 iyul tarixində Bizim.media saytına açıqlama verib.
“Aliyə artıq 9-cu sinifdə oxuyur. Mən onları 5-ə qədər aparmışam. Ümumiyyətlə o sinfin xarakteristikası çox gözəldir. Hamısı çox yaxşı uşaqlardır. 4 il onlara analıq və müəlliməlik etmişəm. Mən Aliyənin aldığı xəsarətləri gördüm. Düşünəndə ki, övladımı kimsə döyüb, o anda nə edərəm, bilmirəm. Açığı dünən mediada oxudum ki, guya Aliyə Camalovanı Rəsilə Əliyeva ilə birgə Yeganə Əsgərova da döyüb. Mən Yeganə müəlliməni 30 ildən çoxdur tanıyıram. O səsini qaldıra bilər, amma əlini yox... Həmişə şagirdlərinin arxasında dayanıb. Hələ də təəcüb içindəyəm. Hər halda araşdırmaların nəticəsində həqiqətlər ortaya çıxacaq”.
Rəsilə Əliyevanın Aliyəni və ailəsini əxlaqsız adlandırması ilə bağlı Gülzar müəllim bunları deyib: “O sinifdə əxlaqsız uşaq ola bilməz. Nəinki Aliyə, heç bir qız və ya oğlan barədə belə ittihamın irəli sürülməsi ciddi yalnışlıq olar. 15 yaşında qızın nə əxlaqsızlığı ola bilər? Aliyədə ana, ata, baba və nənə qayğısı əskik olmayıb. Anası Ləman xanımı uzun müddətdir ki, tanıyıram. Çox mədəni və ziyalı xanımdır. Onda olan bütün mədəni xüsusiyyətlər də Aliyədə toplanıb. Sakit, tərbiyəli, yalanı və əsəbi olmayan qızdır”.
Daha sonra o, Rəsilə Əliyeva haqda danışıb: “Rəsilə Əliyevanı həm valideyn kimi, həm də həmkar kimi tanımışam. İcra başçısının müavini olmamışdan əvvəl bizim məktəbdə Azərbaycan dili fənnini tədris edib.
Təxminən 8 il olar ki, bir yerdə çalışmırıq. Onun qızı Sara da mədəni qızdır. Sara ilə Aliyənin çox gözəl münasibətləri olub. Heç vaxt bir-birlərinə qarşı aqressiv olmayıblar. Belə bir olayın yaşanması çox qəribədir...”.
Qeyd edək ki, Lənkəran şəhər 4 saylı tam orta məktəbin 9-cu sinif şagirdi Aliyə Camalovanın Lənkəran şəhər icra başçısının müavini Rəsilə Əliyeva tərəfindən döyülməsi Daxili İşlər Nazirliyinin regional şöbəsinə daxil olmuş müraciət əsasında araşdırılır.
