78 saylı Lerik seçki dairəsindən millət vəkili seçilən İqbal Məmmədovun oğlu Mirhəmid Nərimanlını şantaj edən şəxs barəsindəki qərardan verilmiş apellyasiya şikayətinə baxılıb. Bu haqda məlumatı Cenublu.az bu gün, 2 iyun tarixində Qafqazinfo-ya istinadən verir.
Deputatın oğlu bildirib ki, onu şantaj edən N.M. sosial şəbəkə vasitəsilə ona hədə-qorxu gələrək, İqbal Məmmədova məxsus olduğu bildirilən intim görüntüləri yayacağını söyləyib. O, özünün və atasının rüsvay olunacağından ehtiyat edərək, şantaj edən şəxsə 1768 manat pul göndərib.
Şantaj edən şəxs N.M. 2022-ci ildə Xəzər Rayon Məhkəməsinin hökmü ilə Cinayət Məcəlləsinin 182-ci (Hədə-qorxu ilə tələb etmə) maddəsi ilə açılmış iş üzrə təqsirli bilinib və ona 3 il həbs cəzası verilib. Lakin daha sonra Bakı Apellyasiya Məhkəməsi hökmün dəyişdirilməsi barədə qərar çıxarıb və ona şərti cəza verilərək həbsdən azad edilib. Apellyasiya Məhkəməsinin qərarından narazı qalan deputatın oğlu Mirhəmid Nərimanlı Ali Məhkəməyə kassasiya şikayəti verib. Beləliklə, N.M. barəsindəki Xəzər Rayon Məhkəməsinin hökmü bərpa edilib. N.M. bir neçə gün əvvəl başa çatan proses nəticəsində məhkəmə zalındaca həbs edilib.
Qeyd edək ki, İqbal Məmmədovun oğlu Mirhəmid Nərimanlı daha öncə də qalmaqallı hadisə ilə gündəmə gəlib.
Belə ki, 2019-cu ildə İqbal Məmmədova məxsus olan və oğlunun rəhbərlik etdiyi Lerikdəki "Relax" istirahət mərkəzində vergidən yayınma faktları üzə çıxıb və Mirhəmid Nərimanlı barəsində cinayət işi açılıb. Həmin vaxt istirahət mərkəzinə gələn yoxlama əməkdaşları ilə M.Nərimanlı arasında dava da düşüb və M.Nərimanlı həbs olunub. Bir müddət sonra o, azadlığa buraxılıb.
