Cənub regionunda “Gender Hub Azerbaijan” sosial platforması tərəfindən yeni layihəyə start verilib. Bu haqda bu gün, 9 iyul tarixində Cenublu.az Azərtac-a istinadən xəbər verir.
“Gizli hekayələr” layihəsi İsveçrə İnkişaf və Əməkdaşlıq Agentliyinin maliyyə və “FemACT” platformasının təşkilati dəstəyi ilə “Gender Hub Azerbaijan” sosial platforması tərəfindən Lənkəran şəhərində həyata keçirilir. Layihənin əsas məqsədi kreativ gənclərin film yaradıcılığı mövzusunda bilik və bacarıqlarının genişləndirilməsinə dəstək olmaqla ölkədə sosial bərabərsizlik və gender əsaslı zorakılıq nəticəsində qadınların üzləşdiyi çətinlikləri qısametrajlı filmlər vasitəsilə təqdim edərək gender bərabərsizliyinə təsir etməkdir.
“Gizli hekayələr”in ilkin mərhələsində Astara, Cəlilabad, Lerik, Lənkəran, Masallı və Yardımlı şəhərləri daxil olmaqla Lənkəran iqtisadi rayonundan və Bakı şəhərindən seçilmiş 20 gənc iştirak edib.
Məlumatda bildirilib ki, layihənin növbəti mərhələsində iştirakçılar kiçik komandalara bölünərək öz hekayə və filmlərini hazırlayacaq və sonuncu mərhələdə onları Bakıda nümayiş etdirəcəklər.
