Cəlilabad rayonunda 12 ailənin yaşadığı binada yanğın baş verib. Bu haqda məlumatı Cenublu.az bu gün, 27 mart tarixində Fövqəladə Hallar Nazirliyinə istinadən verir.
Hadisə Zərifə Əliyeva küçəsində qeydə alınıb. İkimərtəbəli yaşayış binasının 2-ci mərtəbəsində ümumi sahəsi 42 kv.m olan 2 otaqlı mənzilin eyvanının tavanı 6 kv.m sahədə, 1 ədəd qapısı və binanın dam örtüyünün taxta atmaları 30 kv.m sahədə yanıb.
Yanğın 48 yaşlı Rafiq Orucova məxsus mənzildə başlayıb. Hadisə vaxtı ev sahibi mənzildə olmayıb. Yanğına elektrik xətlərində baş verən qısaqapanmanın səbəb olduğu ehtimal edilir.
Sakinlər binadan təxliyə ediliblər. Qısa müddət ərzində yanğın tam söndürülüb.
Faktla bağlı araşdırma aparılır.
