Cəlilabad rayonunda çay sahillərinə məişət tullantılarının atılması ciddi narahatlıq doğurur.
Cenublu.az-ın məlumatına görə, rayon mərkəzindən keçən Mişarçayı uzun müddətdir bəzi sakinlər tərəfindən demək olar ki, zibil poliqonuna çevrilib.
Bildirilir ki, tullantılar birbaşa çayın yatağına atılır. Hazırda havaların quraq keçməsi səbəbindən çayda su olmadığından, atılan zibillər olduğu yerdə qalıb və yığılıb. Halbuki payız və qış aylarında çayda suyun bol olduğu dövrlərdə bu tullantılar axınla sahilboyu ərazilərə yayılaraq çirklənmənin miqyasını daha da artırırdı.
Su səviyyəsinin düşməsi nəticəsində hazırda çayın yatağında toplanmış zibil antisanitar vəziyyəti daha da ağırlaşdırır. Ərazidə yaranan xoşagəlməz mənzərə həm ekoloji mühit, həm də yerli sakinlərin sağlamlığı üçün ciddi təhlükə hesab olunur.
