Cəlilabad şəhərinin Babək küçəsində yaradılan fermanın tullantıları kanala axıdılır. Bu haqda məlumatı Cenublu.az bu gün, 6 aprel tarixinə Oxu.az-a istinadən verir.
Bu xoşagəlməz mənzərə yaxınlıqda yaşayan sakinləri ciddi narahat edir. Sakinlər bildiriblər ki, şəhərin mərkəzində bir qrup şəxs həyətlərində fermalar yaradıb. Fermalarda mal-qara saxlanılır. Buradan çıxan çirkab, tullantı yağış və qrunt sularının axıdılması üçün nəzərdə tutulan kanala tökülür. Bu səbəbdən də, ərazidə kəskin üfunət var. Mövcud vəziyyət bir neçə ildir davam edir.
Onların sözlərinə görə, problemin həll edilməsi üçün bir neçə dəfə şikayət ediblər. Bundan sonra kanalda təmizlik işləri aparılıb. Amma fermanın fəaliyyəti davam etdiyindən vəziyyət dəyişməz qalıb.
Məsələ ilə bağlı Cəlilabad şəhər inzibati ərazi dairəsi üzrə nümayəndəliyindən bildirilib ki, sakinlər rəsmi surətdə ərizə ilə müraciət etməlidirlər. Bundan sonra problemin tam aradan qaldırılması üçün müvafiq işlər görülə bilər.
