Cəlilabad sakini Sumqayıtda həyat yoldaşını qətlə yetirib. Bu haqda məlumatı Cenublu.az bu gün, 27 iyun tarixində Den.az-a istinadən verir.
Hadisə Sumqayıt şəhərinin “Gecəqondu” məhəlləsində, ev 419-da baş verib.
Öldürülən 36 yaşlı Leyla Muradovanın anası Zivər Səfiyeva bildirib ki, onların evində söz-söhbət həmişə olub. Hətta bu yaxınlarda anası onu boşatdıracağını deyib. Qarşı tərəf isə qız anasını əmin edib ki, söz-söhbət bir daha olmayacaq. Ancaq 4 il ərzində ər Leyla Muradovaya olmayan işgəncələr verib. Hətta banklardan kredit götürərək qadını məcbur edirmiş ki, anan ödəsin. Ötən gün isə 36 yaşlı qadın artıq bezdiyini və həyat yoldaşı olan Balafər Muradovun hərəkətlərindən təngə gəldiyini deyib. Məlumata görə, Balafər Muradov 4 illik həyat yoldaşının başını kəsdikdən sonra qızını da götürərək Cəlilabada qaçıb. Sonra könüllü olaraq polisə təslim olub.
Məlumat üçün bildirək ki, 26 iyun tarixində 36 yaşlı Leyla Muradovanın öldürülməsi barədə şəhər prokurorluğuna məlumat daxil olub.
Sumqayıt şəhər prokurorluğundan bildirilib ki, aparılmış araşdırma zamanı 1993-cü il təvəllüdlü Balafər Muradovun aralarında yaranmış mübahisə zamanı arvadı Leyla Muradovaya bıçaqla xəsarətlər yetirərək onu qəsdən öldürməsinə əsaslı şübhələr müəyyən edilib.
Faktla bağlı Sumqayıt şəhər prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılıb, Balafər Muradov şübhəli şəxs qismində tutularaq istintaqa cəlb olunub.
Hazırda istintaq tədbirləri davam edir.
