Cəlilabad rayonunda oğul ailə münaqişəsi zəminində anasına xəsarət yetirib. Bu haqda məlumatı Cenublu.az bu gün, 27 iyun tarixində Teleqraf.com-a istinadən verir.
Ailə Cəlilabad rayonunun Göytəpə şəhərində yaşayır. 41 yaşlı Pərviz "KamAZ" yük avtomaşınının sürücüsü işləyir və 10 gündən bir evdə olur. Həyat yoldaşı Könül əslən Yardımlı rayonundandır. Eyni zamanda dayısı qızıdır. Könüllə 2008-ci ildə evləniblər və 4 azyaşlı övladları var.
Məhkəmə prosesi zamanı məlum olub ki, Pərviz içki aludəçisidir. Həyat yoldaşı ilə mübahisə edərkən anası onları ayırmaq üçün aralarına girib.
“Spirtli içkili vəziyyətdə olduğuma görə əsəblərimi cilovlaya bilmədim. Anamın bu hərəkətinə görə yumruqla onun ağzından bir zərbə vurdum. Anamın alt dodağı partladı”, - deyə Pərviz məhkəmədə bildirib.
Daha sonra zərərçəkmiş məsələ ilə bağlı Göytəpə Polis Bölməsinə müraciət edib:
“Orada bir ana olaraq öz övladımdan polisə şikayət ərizəsi yazdım".
Pərvizə Cinayət Məcəlləsinin 128-ci (qəsdən sağlamlığa xəsarət yetirmə) maddəsi ilə ittiham elan edilib.
Cinayət işinə Cəlilabad rayon Məhkəməsində baxılıb.
Məhkəmə təqsirləndirilən şəxsin zərərçəkmişlə barışdığını, zərərçəkmiş şəxsin ondan şikayətçi olmadığını nəzərə alıb.
Bu səbəbdən Pərviz barəsində olan cinayət təqibinə xitam verilib. O, cinayət məsuliyyətindən azad edilib.
