Cəlilabad şəhərinin Qurtuluş küçəsində çirkab su küçəyə axıdılır. Bu haqda məlumatı Cenublu.az bu gün, 28 mart tarixində Report.az-a istinadən verir.
Sakinlərin sözlərinə görə, artıq bir neçə aydır ərazidəki kanalizasiya xətləri tutulub. Bu səbəbdən də çirkab su küçəyə axıdılır. Nəticədə şəhərin mərkəzində antisanitar vəziyyət yaranıb. Ərazidə küçə boyu onlarla ticarət obyekti fəaliyyət göstərir. Küçəyə axıdılan da həmin obyektlərin çirkab suyudur.
Məsələ ilə bağlı Cəlilabad Sukanal İdarəsindən bildirilib ki, sözügedən kanalizasiya xətti yağış suları üçün nəzərdə tutulsa da, artıq istismar müddəti başa çatıb.
"Bu səbəbdən şəhərə yeni kanalizasiya xətləri çəkilib. Mövcud problemin aradan qaldırılması üçün ərazidə fəaliyyət göstərən obyektlərin sahibləri aidiyyəti üzrə müraciət edib texniki şərt almalıdırlar. Bundan sonra yeni abonentlər şəhərə çəkilmiş kanalizasiya xəttinə qoşulacaqlar", - idarədən bildirilib.
Qeyd edək ki, bu küçə, həm də köhnə Ələt-Astara magistralının Cəlilabad rayonu istiqamətindən keçən hissəsidir.
