Son günlərdə yağan dolu Cəlilabadın əksər kəndlərində biçilməmiş əkinləri yararsız hala salıb. Cenublu.az bu barədə 30 iyun tarixində ATV News-a istinadən xəbər verir.
Havaların qeyri-sabit keçməsi nəticəsində ən çox taxıl, noxud və mərci sahələrinə ziyan dəyib. Əkin sahələrini vaxtında sığorta etdirmədikləri üçün fermerlər kompensasiya ala bilməyəcəklər. Qaydalara əsasən, təbiət hadisəsi zamanı dəymiş ziyana görə kompensasiya yalnız əkin sahələrini sığorta etdirən fermerlərə ödənilir.
Cəlilabad Dövlət Aqrar İnkişaf Mərkəzinin əməkdaşı İlham Babayev məsələ ilə bağlı açıqlama verib:
"Biz dəfələrlə vətəndaşlarla görüşüb fikrimizi bildirmişik ki, ərazisindən asılı olmayaraq, sahələri sığortalamaq lazımdır. 10 hektardan yuxarı olan sahələri sığortalamaq məcburidir. 10 hektardan aşağı olan əkin sahələrini sığortalamaq isə könüllüdür. Lakin vətəndaşlar buna məhəl qoymayıblar. Ona görə də təbii fəlakət nəticəsində dəyən ziyanın dövlət tərəfindən qarşılanması mümkün deyil".
İlham Babayev, həmçinin qeyd etdi ki, ümid növbəti əkin ilinə qalır. Vətəndaşlarla bir daha maarifləndirmə işləri aparılır ki, növbəti il üçün sahələri sığorta elətdirməyə laqeyd yanaşmasınlar. Əks təqdirdə görünən mənzərə qaçılmazdır.
Daha öncə Cəlilabadda biçilməmiş əkinlərin yararsız hala düşməsi barədə məlumat vermişdik.
