Bu gün, 5 iyun tarixində qəhrəman şəhidimiz kapitan Vüsal Quliyevin mövlud günüdür.
Vüsal Quliyev 1985-ci ildə Lənkəran şəhərində Tahir Quliyev və Gülparə Quliyevanın ailəsində anadan olub. 1991-2002-ci illərdə Lənkəran şəhər Xarici Dillər Təmayüllü Gimnaziyada orta təhsil alıb. 2002-2006-cı illərdə Heydər Əliyev adına Hərbi İnstitutda ali hərbi təhsil alıb. Sonra bir müddət "Zabit ixtisaslaşdırma kursu"ndan keçib. Fərqanə Quliyeva ilə ailəli idi, Ruqəyya, Məryəm və Hüseynəli adlı övladları yadigar qalıblar.
2007-ci ildə ixtisaslaşdırma kursunu başa vuran Vüsal Quliyev Azərbaycan Silahlı Qüvvələrinin sıralarında, Gəncə şəhərində yerləşən "N" saylı hərbi hissələrin birində leytenant rütbəsində tağım komandiri kimi hərbi vəzifəsinə başlayıb. 2009-cu ildə Ağstafada baş leytenant rütbəsində batareya komandiri kimi xidmət edən Vüsal Quliyev 2013-cü ildə kapitan rütbəsi alaraq hərbi xidmətini Ağcabədidə davam etdirib. 2016-cı ildə Beyləqanda qoşun xidmət rəisinin müavini, 2019-cu ildə Goranboy rayonunun Goran qəsəbəsində və son olaraq 2020-ci ildə Tərtər rayonunda kəşfiyyat rəisinin müavini olaraq xidmət edib. Hərbi xidmət müddətində fərqləndiyinə görə dəfələrlə medal, fəxri fərman və təşəkkürnamələrlə təltif olunub.
Vətən müharibəsində Suqovuşanın azadlığı uğrunda gedən döyüşlərdə vuruşub. O, 28 sentyabr 2020-ci ildə Tərtər rayonunun Suqovuşan qəsəbəsi istiqamətində döyüş tapşırığının yerinə yetirilməsi zamanı şəhid olub. Lənkəran şəhərində dəfn olunub.
Ölümündən sonra "Vətən uğrunda", "Füzulinin azad olunmasına görə", "Qubadlının azad olunmasına görə", "İgidliyə görə" və 3-cü dərəcəli "Rəşadət" ordeni ilə təltif edilib.
