Bu gün Azərbaycan Silahlı Qüvvələrinin əsgəri, Vətən müharibəsi şəhidi Ruslan Aslan oğlu Əliyevin doğum günüdür.
Ruslan Əliyev 2000-ci ildə aprelin 8-i Astara rayonunun Ərçivan qəsəbəsində anadan olub. Ərçivan qəsəbəsi 4 saylı tam orta məktəbdə oxuyub. Ruslan yeniyetmə və gənc yaşlarında Astara Boks mərkəzində boksla məşğul olub, təlim məşqlərində, rayon və respublika yarışlarında müntəzəm iştirak edib, uğurlar qazanıb.
R.Əliyev boks üzrə Azərbaycan birinciliyinin ikiqat gümüş və bürünc medalçısı, Azərbaycan yığma komandasının üzvü olub. 2018-ci ildə Goranboy, Mingəçevir, Tərtər bölgələrində hərbi xidmətdə olub.
2020-ci ildə hərbi xidmətdən qayıtdıqdan sonra MAHHXHQ kimi çalışmağa başlayıb. Vətən müharibəsi zamanı Tərtərin Ağdərə istiqamətində ermənilərin çoxlu texnika və canlı qüvvəsini məhv edib. Ruslan 29 sentyabr 2020-ci ildə Tərtərin Talış kəndi uğrunda gedən döyüşlərdə savaşaraq şəhidlik zirvəsinə ucalıb. Onun nəşi doğulub boya-başa çatdığı Ərçivan qəsəbəsində dəfn edilib.
Azərbaycan Respublikasının Prezidenti İlham Əliyevin Sərəncamına əsasən MAHHXHQ, əsgər Əliyev Ruslan Aslan oğlu ölümündən sonra "Vətən uğrunda" medalı ilə təltif olunub.
