Bu gün, 17 iyun tarixində Azərbaycan Silahlı Qüvvələrinin əsgəri, Vətən müharibəsi şəhidi Əsəd Mahir oğlu Əsədlinin mövlud günüdür.
Əsəd Əsədli 1995-ci ildə Masallının Çayqıraq kəndində anadan olub. Bakının Nizami rayonunda Milli Qəhrəman şəhid Yuri Kavalyov adına 229 saylı tam orta məktəbi bitirib. 2012-ci ildə Azərbaycan Dövlət İqtisadiyyat Universitetinə daxil olub.
2016-2018-ci illərdə Naxçıvanda ordu sıralarında xidmət edib, hərbi kəşfiyyatçı peşəsinə yiyələnib. Hərbi xidməti keçdiyi müddətdə iki dəfə komandanlıq tərəfindən nümunəvi xidməti qeyd olunub, tərifnamə ilə təltif edilib.
Vətən müharibəsi zamanı Əsəd Əsədli Füzuli və Xocavənd döyüşlərində savaşıb. Son döyüşü noyabrın 9-da Xocavənd rayonunun strateji yüksəkliklərindən birinin müdafiəsi uğrunda olub. Əsəd döyüş yoldaşlarını mühasirədən çıxarsa da, özü şəhid olub. II Şəhidlər xiyabanında dəfn edilib.
Ölümündən sonra "Vətən uğrunda", "Füzulinin azad olunmasına görə", "Xocavəndin azad olunmasına görə" və "Hərbi xidmətlərə görə" medalları ilə təltif olunub.
