Lənkəran Rayon İcra Hakimiyyətinin başçısı Taleh Qaraşovun sabiq müavini, məktəbliyə zorakılıq etməkdə ittiham olunan Rəsilə Arifqızı barəsindəki qərardan verilən kassasiya protesti üzrə məhkəmə iclası bu gün, 30 may tarixində Ali Məhkəmədə keçiriləcək. Protest hakim Rəşad Abdulovun sədrliyi ilə araşdırılacaq. Bu haqda məlumatı Cenublu.az Qaynarinfo-ya istinadən verir.
Belə ki, Lənkəran Rayon Məhkəməsinin hökmü ilə Rəsilə Arifqızına 4 min manat cərimə cəzası təyin olunub. Hökmdən narazı qalan dövlət ittihamçısı kassasiya protesti verib. Şirvan Apellyasiya Məhkəməsi qərarı dəyişdirmədən qüvvədə saxlayıb. Daha sonra prokuror kassasiya protesti ilə Ali Məhkəməyə müraciət edərək işin yenidən araşdırılmasını istəyib. Prokuror hesab edir ki, cinayət işi birinci instansiya və apellyasiya instansiyasında düzgün tədqiq olunmayıb, irəli sürülmüş ittihama görə yüngül cəza təyin olunub.
Qeyd edək ki, istintaqla Rəsilə Arifqızı attestat verilməsi bəhanəsi ilə xidməti sürücüsü vasitəsilə Lənkəran şəhər V.Əliyev adına 4 nömrəli humanitar təmayüllü məktəb-liseyin 9-cu sinif şagirdini yaşadığı evə gətirdib, vəzifəli şəxs kimi xidməti səlahiyyətlərinin hüdudlarından açıq-aşkar surətdə kənara çıxaraq yetkinlik yaşına çatmadığını nəzərə almadan yeniyetmənin mobil telefonunu əlindən alıb, şəxsi məlumatlarını yaxın qohumlarının mobil telefonlarına göndərməklə sonuncunun hüquqlarına və qanuni mənafelərinə mühüm zərər vurmasına, həmçinin ona sağlamlığa zərər vurmayan bədən xəsarətləri yetirməsinə əsaslı şübhələr müəyyən edilib.
Toplanmış sübutlar əsasında Rəsilə Arifqızına Cinayət Məcəlləsinin 309.1-ci (vəzifə səlahiyyətlərini aşma) maddəsi ilə ittiham verilib.
O, ötən ilin iyul ayında vəzifəsindən kənarlaşdırılsa da, hələlik yerinə təyinat olmayıb.
