Bu gün, 4 aprel tarixində Azərbaycan Silahlı Qüvvələrinin giziri, Aprel döyüşlərinin şəhidi Nurlan Bayram oğlu Əsgərlinin şəhidlik zirvəsinə ucaldığı gündür.
Nurlan Əsgərli 3 dekabr 1995-ci ildə Masallı rayonunun Viləş kəndində anadan olub. Orta təhsil zamanı idmanla, xüsusilə boksla və cüdoyla məşğul olub. Rayon üzrə cüdo və boks çempionatlarından 1-ci və 3-cü yerləri tutaraq qayıdıb. Orta məktəbi bitirdikdən sonra, 2014-cü ilin yanvar ayında Masallı rayon Hərbi komissarlığından həqiqi hərbi xidmətə çağırılıb. 2015-ci ilin aprel ayında kəşfiyyatçı kursuna daxil olub. Həmin ilin iyul ayında həqiqi hərbi xidmətini başa vurduqdan sonra müddətdən artıq xidmət etmək üçün könüllü olaraq hərbi xidmətini baş əsgər rütbəsində davam etdirib. Xidmətinə görə gizir rütbəsi alıb.
2016-cı il aprelin 1-dən 2-nə keçən gecədən başlayaraq Azərbaycan və Ermənistan Silahlı Qüvvələrinin bölmələri arasında cəbhənin Tərtər və Cəbrayıl-Füzuli istiqamətlərində şiddətli döyüşlər başlayıb. Tarixə Aprel döyüşləri kimi yazılan hərbi əməliyyatlar zamanı Nurlan Əsgərli Tərtər rayonunun Talış kəndi istiqamətində döyüşlərdə vuruşub. Gecə döyüşləri zamanı Tərtər rayonunun Talış kəndi istiqamətində olan əlverişli mövqelər, strateji nöqtələr, o cümlədən Talış yüksəkliyi Azərbaycan Ordusu tərəfindən işğaldan azad olundu. Nurlan Əsgərli özü ilə eyni rütbədə olan qardaşı, gizir İntiqam Əsgərli ilə birlikdə döyüşürdü. Qardaşı ilə birgə döyüş meydanından şəhidlərimizin, həmçinin, polkovnik Vüqar Yusifovun və polkovnik-leytenant Raquf Orucovun nəşini çıxarıb. Nurlan Əsgərli 4 aprel 2016-cı ildə Talış kəndi istiqamətində gedən döyüşlərdə döyüş tapşırığının yerinə yetirilməsi zamanı şəhid olub. Onun nəşini döyüş meydanından çiyin-çiyinə vuruşduğu doğma qardaşı İntiqam Əsgərli çıxardı. İntiqam Əsgərlinin dediklərindən:
| “Komandirimizi (Raquf Orucovu) şəhid gördüyümüzdən ikimiz də çox sarsılmışdıq. Müəyyən bir məsafəyə qədər aparıb, arxada bizi gözləyən əsgərlərə təhvil verdik, sonra Vüqar Yusifovu çıxarmağa getdik.
Elə bu vaxt yenə də bizim tərəfə mərmi düşdü. Torpağın toz-dumanı çəkiləndən sonra baxdım ki, Nurlan yoxdur. Elə bu vaxt yenə də bizim tərəfə mərmi düşdü. Onun yıxıldığı istiqamətə qaçdım. Qardaşım yaralanmışdı. Fikirləşdim ki, üstümdəki tibbi ləvazimatla ona yardım edə bilərəm... Mən Nurlana çatanda, hələ canını tapşırmamışdı... Onu qollarımın arasına aldım... 30 saniyədən sonra qardaşım şəhid oldu…” |
Nurlan Əsgərli göstərdiyi qəhrəmanlığa görə ölümündən sonra Azərbaycan Respublikasının Prezidenti İlham Əliyevin Sərəncamı ilə "Hərbi xidmətdə fərqlənməyə görə" III dərəcəli medalı ilə təltif edilib.
İntiqam Əsgərli isə Vətən müharibəsi zamanı, 9 noyabr 2020-ci ildə Şuşanın azadlığı uğrunda gedən döyüşlərdə şəhid olub.
