Bu gün, 29 iyun tarixində Azərbaycan Çevik Hərəkət Qüvvələrinin kiçik giziri, Vətən müharibəsi şəhidi Orxan Elxan oğlu Quluzadənin mövlud günüdür.
Orxan Quluzadə 1994-cü ildə Lənkəran şəhərində anadan olub. 2000-2011-ci illərdə S. Vurğun adına 4 nömrəli Humanitar Təmayüllü Liseydə təhsil alıb. Ailəli idi. Ayla adında bir qızı yadigar qalıb.
Orxan Quluzadə 2011-2012-ci illərdə Azərbaycan Silahlı Qüvvələrinin Abşeron rayonunda yerləşən "N" saylı hərbi hissəsində müddətli həqiqi hərbi xidmətdə olub. 2018-ci ildən isə Dövlət Sərhəd Xidmətinin (DSX) Yevlax şəhərində yerləşən "N" saylı hərbi hissəsində müddətdən artıq həqiqi hərbi xidmət qulluqçusu olaraq xidmət edib.
Vətən müharibəsi zamanı Zəngilanın azadlığı uğrunda gedən döyüşlərdə savaşıb. Orxan Quluzadə 8 noyabr 2020-ci ildə Zəngilan döyüşləri zamanı Şükürataz dağı istiqamətində şəhid olub.
Ölümündən sonra "Qarabağ" ordeni, "Vətən uğrunda" və "Zəngilanın azad olunmasına görə" medalları ilə təltif olunub.
