Bu gün, 21 iyun tarixində Masallı rayon Ağsaqqallar Şurasının sədri, “lll dərəcəli Vətənə xidmətə görə” ordenli Ələşrəf Niftiyevin doğum günüdür.
Ələşrəf Nuru oğlu Niftiyev 1945-ci ildə Masallı şəhərində kolxozçu və Böyük Vətən muharibəsi əlili ailəsində anadan olub. Masallı şəhər 2 saylı orta məktəbi bitirdikdən sonra Lənkəran Pedaqoji Texnikumunun rus dili bölməsini və M. F. Axundov adına Azərbaycan Dövlət Xarici Dillər İnstitutunu bitirib.
O, müxtəlif illərdə Masallı rayon Komsomol Komitəsinin təşkilat şöbəsinin müdiri və birinci katibi vəzifələrində çalışıb, Masallı rayon Partiya Komitəsində təşkilat şöbəsinin müdiri, rayon qəzetində şöbə müdiri olub.
1993-cü ilin noyabr ayına kimi Masallı şəhər 2 saylı orta məktəbdə müəllim işləyib. 1993-2009-cu illərdə Masallı rayon İcra Hakimiyyəti başçısının müavini, təhsil, səhiyyə və mədəniyyət məsələləri üzrə şöbə müdiri vəzifəsində işləyib. Əmək veteranıdır.
Ələşrəf Niftiyev dövlət qulluğunda səmərəli fəaliyyətinə görə Azərbaycan Respublikası Prezidentinin 22 iyun 2007-ci il tarixli Sərəncamı ilə “III dərəcəli Vətənə xidmətə görə” ordeni ilə təltif olunub.
