Bu gün, 18 may tarixində Cənubi Qafqazda ilk böyrək köçürülmə əməliyyatını həyata keçirən, SSRİ məkanında ən güclü uroloji məktəbin yaradıcısı, Əməkdar elm xadimi, tibb elmləri doktoru, professor, AMEA-nın həqiqi üzvü, Azərbaycan Dövlət Həkimləri Təkmilləşdirmə İnstitutunun rektoru olmuş görkəmli uroloq Mirməmməd Cavadzadənin doğum günüdür.
Mirməmməd Cavad oğlu Cavadzadə 1927-ci ildə Lənkəran şəhərində anadan olub. Cavadzadə orta məktəbi bitirdikdən sonra Azərbaycan Dövlət Tibb İnstitutunda təhsil alıb. O, 1948-1951-ci illərdə Lənkəran və Astara xəstəxanalarında işləyib. 1951-ci ildə Cavadzadə Moskva Tibb İnstitutuna daxil olub. O, 1954-1957-ci illərdə Simferopolda, sonra isə Krım Tibb İnstitutunun Urologiya kafedrasında çalışıb.
Həkim 1958-ci ildə SSRİ-də ilk dəfə keçirilmiş kəskin böyrək çatışmazlığı olan xəstələrin hemodializində iştirak edib.
O, 1963-cü ildə Bakıya gələrək Azərbaycan Dövlət Həkimləri Təkmilləşdirmə İnstitutunun kafedra müdiri, 1974-cü ildə isə rektoru təyin olunub və 45 il bu vəzifədə çalışıb. Cavadzadə 1965-ci ildə Azərbaycan Səhiyyə Nazirliyinin baş uroloqu təyin edilib. Onun sayəsində 1988-ci ildə İnstitutun klinikası istifadəyə verilib.
Cavadzadənin təşəbbüsü ilə 1966-cı ildə SSRİ dövründə Azərbaycanda yeganə ixtisaslaşdırılmış urologiya klinikası açılıb. Respublika Klinik Uroloji Xəstəxanası Qafqazda yeganə, SSRİ-də isə dördüncü tibb müəssisəsi idi ki, orada böyrək köçürülməsi əməliyyatları uğurla aparılırdı. Hazırda həmin xəstəxana onun adını daşıyır.
1971-ci ildə Cavadzadə Cənubi Qafqazda və müsəlman Şərqində ilk dəfə olaraq terminal böyrək çatışmazlığında böyrək köçürülməsi əməliyyatını həyata keçirib.
Ümumilikdə həkim 19 mindən çox əməliyyat keçirib və 700-dən çox elmi məqalənin müəllifidir.
Cavadzadə Beynəlxalq və Avropa uroloqları cəmiyyətlərinin üzvü idi. 1975-1991-ci illərdə o, həmçinin Azərbaycan Respublikası Ali Sovetinin deputatı, Azərbaycan–Fransa dostluq cəmiyyətinin, Azərbaycan Uroloqları Cəmiyyətinin, başqa ictimai təşkilatların və qurumların sədri olub. Həkim “Şöhrət” ordeni ilə yanaşı, bir çox başqa mükafatlara layiq görülüb.
Cavadzadə 7 avqust 2008-ci ildə Bakıda vəfat edib və Birinci Fəxri xiyabanda dəfn olunub.
