Bu gün Birinci Qarabağ müharibəsinin şəhidi Asəf Zəbulla oğlu Rzayevin anım günüdür.
Asəf Rzayev 10 aprel 1974-cü ildə Lənkəran rayonunun Mamusta kəndində dünyaya gəlib. Orta təhsilini kənddə aldıqdan sonra, N.Nərimanov adına sovxozda fəhlə işləməyə başlayır. 1992-ci ilin iyun ayında o, hərbi xidmətə yollanır. Kəlbəcər ətrafında gedən döyüşlərdə iştirak edir. Qar uçqunu nəticəsində onun yüzlərlə əsgər yoldaşı qar altında qalır, lakin Asəf və bir neçə əsgər sağ qalaraq Ağdərə istiqamətində olan dəstəyə birləşirlər. Ordu hissələri tez-tez yerlərini dəyişdiyi üçün Asəf Tərtər, Ağdam istiqamətlərində olan döyüşlərdə iştirak edir. Füzuli rayonu istiqamətində o, minaya düşür. Döyüş dostları onu öz çiyinlərində xeyli aparsalar da həkim yardımı olmadığı üçün həyatını qurtarmaq mümkün olmur.
Vətənpərvər həmyerlimiz 28 yanvar 1994-cü ildə şəhid olur. O, doğulub böyüdüyü Mamusta kənd qəbristanlığında dəfn olunur.
