Biləsuvar sakinlərinin müraciətləri əsasında aparılan araşdırmalar nəticəsində rayonun su təchizatında bir sıra uyğunsuzluqlar müəyyən edilib.
Bu barədə Qafqazinfo.az-a Antiinhisar və İstehlak Bazarına Nəzarət Dövlət Agentliyindən məlumat verilib. Bildirilib ki, ADSEA-nın “Regional Su Meliorasiya Xidməti” PHŞ tərəfindən su təchizatı prosesində hüquqi tələblərə tam uyğunluğun təmin olunması üçün əlavə tədbirlərə ehtiyac olduğu aşkar edilib.
Araşdırma nəticəsində suyun verilməsi, tariflərin tətbiqi və istehlakçı hüquqlarının qorunması sahəsində bir sıra pozuntuların olduğu müəyyənləşib. Bununla əlaqədar quruma xidmətlərin keyfiyyətinin yüksəldilməsi və qanunvericiliyə uyğunlaşdırılması ilə bağlı icrası məcburi göstəriş verilib.
Göstərişə əsasən, Biləsuvarda su təchizatının dayanıqlığının artırılması, abonentlərlə işin şəffaflaşdırılması, tariflərin düzgün tətbiqi və texniki infrastrukturun mərhələli şəkildə təkmilləşdirilməsi nəzərdə tutulur.
