DSX-nin Sərhəd Qoşunlarının “Horadiz” sərhəd dəstəsinin Beyləqan rayonunun II Şahsevən kəndi yaxınlığında yerləşən sərhəd zastavasının xidməti ərazisində Azərbaycan Respublikasından İran İslam Respublikası istiqamətində dövlət sərhədini pozmağa cəhd edən Göygöl rayon sakini Paşayev Azər Seyfəddin oğlu və Salyan rayon sakini Muradov Elnur Mənəfağa oğlu saxlanılıblar. Bu haqda məlumatı Cenublu.az bu gün, 3 aprel tarixində Dövlət Sərhəd Xidmətinə istinadən verir.
Araşdırma zamanı qeyd olunan şəxslərin “Toyota Prius” markalı 99-DC-626 dövlət nömrə nişanlı avtomobillə gəldiyi və ərazidə daha 4 (dörd) nəfərin olduğu müəyyənləşdirilib.
Həyata keçirilmiş əməliyyat-axtarış tədbirləri nəticəsində hadisə yerindən uzaqlaşmağa cəhd edən nəqliyyat vasitəsinin sürücüsü, Cəlilabad rayon sakini Şahmarlı Aqil Yaşılxan oğlu və Göygöl rayon sakini Kazımov Röyal Rövşən oğlu şühbəli şəxslər qismində saxlanılıblar.
Sərhəd axtarış tədbirləri davam etdirilərkən, saat 15:45-də gizlənərək təqibdən yayınmağa çalışan Göygöl rayon sakini Əsgərov Rəfail Məhərrəm oğlu və Tərtər rayon sakini Əzimov Orxan İlqar oğlu sərhəd naryadı tərəfindən saxlanılıblar.
Saxlanılan şəxslər törətdiyi cinayət əməlini etiraf edərək, dövlət sərhədini pozmaqda məqsədlərinin İrandan Azərbaycana narkotik vasitə gətirmək olduğunu bildiriblər.
Fakt üzrə əməliyyаt-istintaq tədbirləri dаvаm еtdirilir.
