Azərbaycanda dövlət dəstəyi ilə təqdim olunan aqrar sığorta mexanizmi vasitəsilə limon, naringi və portağal bağlarının sığortalanması mövsümü başlayıb.
Cenublu.az Aqrar Sığorta Fonduna istinadən xəbər verir ki, Fond sitrus bağlarını çoxsaylı risklərdən – dolu, fırtına, qasırğa, normadan artıq qar yağıntısı, sel-subasma, şaxtavurma, vəhşi heyvanların hücumu, üçüncü şəxslərin hərəkətləri kimi hadisələrdən sığorta edir.
Sığorta haqqına tətbiq edilən 50 %-lik dövlət dəstəyi fermerlərə öz sitrus bağlarını cüzi məbləğ ödəməklə sığortalamağa imkan verir. Sığorta haqqının 50 %-ni dövlət, 50 %-ni isə fermer ödəyir.
Cənub bölgəsində 1 000 manatlıq limon, naringi (mandarin) və portağal meyvəsinin çoxsaylı risklərdən sığortalanması fermerə olduqca kiçik bir məbləğə - cəmi 12 manata başa gəlir.
Sitrus bağı sahibləri əlavə olaraq meyvə bağlarındakı ağacları ayrıca sığorta edə bilərlər. Bu halda, ağac tələf olarsa, fermerə ağacın 3 illik meyvəsinin dəyəri qədər sığorta ödənişi edilir. Bu sığorta məhsulu üzrə sığorta tarifi cəmi 0,83 % təşkil edir.
Məsələn, ildə 30 manatlıq məhsul gətirən naringi (mandarin) ağacının illik sığorta haqqı cəmi 74 qəpikdir. 50 %-lik dövlət dəstəyini nəzərə aldıqda, fermer cəmi 37 qəpik ödəməklə ağacı çoxsaylı risklərdən sığorta edə bilər.
