Lənkəranda səfərdə olan Aİ səfirləri Lənkəran Dövlət Universitetində olublar. Bu haqda məlumatı Cenublu.az bu gün, 9 iyun tarixində Apa.az-a istinadən verir.
Səfirlər Universitetin tələbələri ilə görüşüblər. Görüş zamanı Lənkəran Dövlət Universitetinin rektoru Natiq İbrahimov əlavə edib ki, Lənkəran Dövlət Universiteti Aİ-nin maliyyyələşdirdiyi proqramlarda da iştirak edir. Hazırda Universitet 3 Erasmus proqramında iştirakçıdır və sonuncu layihə may ayında başladılıb ki, bu, yaşıl keçid/iqtisadiyyatla bağlıdır.
Daha sonra Aİ-nin Azərbaycandakı Nümayəndəliyinin rəhbəri Peter Mixalko çıxış edib:
“Sabah Lənkəranda keçiriləcək "Avropa şəhərciyi"ndə sizlər təhsil sahəsi ilə bağlı imkanlar barədə ətraflı məlumatlar ala biləcəksiniz. Aİ və Azərbaycan arasındakı möhkəm tərəfdaşlığın daha da dərinləşməsi üçün səfər etmişik. Bizim Azərbaycanla sazişimiz var: bu, ötən əsrdə imzalanıb, neçə on illikdir qüvvədədir, biz hazırda yeni sənədin üzərində işləyirik, çünki biz 21-ci əsrə daxil olmuşuq, buna görə də yeni saziş tələb olunur. Bizim Azərbaycanla əməkdaşlığımızın hüdudları genişlənib, bura yeni sektorlar əlavə olunub. Biz Azərbaycandakı islahatları dəstəkləyirik, Avropanın təcrübəsini bura gətirmək niyyətindəyik, buna hazırıq. Biz hökumətlərlə, cəmiyyətlə, media ilə işləyirik. Bu il Aİ və Azərbaycan arasında əməkdaşlıq göstəricilərində, ticarətdə yeni rekordlara imza atılıb”.
