Astara sakinində 5 kiloqramdan artıq narkotik vasitə aşkarlanıb. Bu haqda məlumat DİN-in mətbuat xidmətinin Lənkəran regional qrupundan Cenublu.az-a bu gün, 14 iyun tarixində verilib.
Belə ki, Astara Rayon Polis Şöbəsinin əməkdaşları tərəfindən keçirilən əməliyyat tədbirləri zamanı narkotik vasitələrin qanunsuz dövriyyəsində şübhəli bilinən Ərçivan qəsəbə sakini, əvvəllər məhkum olunmuş İlkin Hüseynov saxlanılıb. Şəxsi axtarış zamanı ondan heroin aşkarlanaraq götürülüb.
Əməliyyat tədbirlərinin davamı nəticəsində İ.Hüseynovun yaşadığı Ərçivan qəsəbəsi ərazisindəki köhnə tikilidə gizlətdiyi sellofan torbadan 4 kiloqram heroin və 1 kiloqramdan artıq metamfetamin aşkarlanaraq götürülüb. İlkin araşdırma zamanı İ.Hüseynovun həmin narkotik vasitəni şəxsiyyəti istintaqla araşdırılan İran vətəndaşı vasitəsilə satışını təşkil etmək məqsədilə əldə etdiyi müəyyən olunub. İ.Hüseynov barəsində məhkəmənin qərarı ilə həbs qətimkan tədbiri seçilib.
Faktla bağlı Astara RPŞ-də araşdırma aparılır.
