Daha öncə xəbər verdiyimiz kimi, Naxçıvan şəhərində iki gənc Astara rayon Pensər kənd sakinləri – 19 yaşlı Fəttah Zəkəriyəyev və 18 yaşlı Əli Mehrəliyev Bazar gölündə boğularaq ölüblər.
Hadisənin baş verməsi barədə onların yaxını Ağayev Emil Modern.az-a açıqlama verib. O bildirib ki, hadisə zamanı Əlinin telefonu suya düşüb, onu götürmək istəyəndə sürüşərək gölə yıxılıb. Fəttah isə ona kömək etmək üçün gölə atılıb və nəticədə hər ikisi suda boğulub.
"Hər ikisi bu il birinci kursu bitirəcəkdi. Fəttahın valideynləri işləmir, arıçılıqla məşğuldurlar. Əlinin atası və anası müəllimdirlər. Eyni kənddəndirlər. Valideynləri ilə danışıblar. Hələ Naxçıvandadırlar, valideynlərinə məlumat verilib, rayona gətiriləcəklər", – deyə o qeyd edib.
Qeyd edək ki, hər iki gənc Naxçıvan Dövlət Universitetinin Stomatologiya ixtisasının I kurs tələbələri idi. Onlar qohum idilər.
