"Səyyar ASAN" avtobusu Astara şəhər Mədəniyyət evinin qarşısında vətəndaşlara xidmət göstərir. Bu haqda məlumatı Cenublu.az bu gün, 11 aprel tarixində verir.
Səyyar şəkildə göstərilən xidmətlər Ədliyyə Nazirliyi, Daxili İşlər Nazirliyi, Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondu, İqtisadiyyat Nazirliyi yanında Əmlak Məsələləri Dövlət Xidməti tərəfindən təqdim olunur.
Eyni zamanda 3 növ funksional yardımçı xidmət – tərcümə və tibb xidməti, o cümlədən "Azərpoçt" MMC tərəfindən göstərilən bank xidmətləri təşkil edilir.
Hazırda Astara şəhərində fəaliyyət göstərən "Səyyar ASAN" avtobusunun növbəti dayanacağı Cəlilabad rayonu olacaq.
Bildirək ki, səyyar "ASAN Xidmət" avtobuslarında sənəd qəbulu həftəiçi saat 10:00-dan 17:30-dək (nahar fasiləsi 14:00-dan 15:00-dək) həyata keçirilir. Hazır sənədin verilməsi isə həftəiçi saat 10:00-dan 18:00-dək (nahar fasiləsi 14:00-dan 15:00-dək) həyata keçirilir.
Qeyd edək ki, ümumilikdə Astarada səyyar xidmət 18 dəfə (12 dəfə “Səyyar ASAN Xidmət” avtobusu, 6 dəfə “Səyyar ASAN” qatarı vasitəsilə) gerçəkləşib. 12 dəfə gerçəkləşən səyyar "ASAN xidmət" avtobusları vasitəsilə 53.000-dən çox vətəndaş müraciəti daxil olub. 6 dəfə gerçəkləşən "Səyyar ASAN" qatarı vasitəsilə isə 15.000-dən çox vətəndaş müraciəti daxil olub.
