Astara rayon D.Əsədov adına Şahağacı kənd 2 nömrəli tam orta məktəbində Lənkəran–Astara Regional Gənclər və İdman İdarəsinin təşkilatçılığı ilə “Erkən nikaha son deyək” və “Narkomaniya – əsrin bəlası” mövzularında maarifləndirici seminar keçirilib. Bu haqda məlumatı Cenublu.az bu gün, 18 may tarixində verir.
Tədbirdə orta məktəblərin yuxarı sinif şagirdləri, müəllim heyəti və nümayəndələr olmaqla 85 nəfər iştirak edib.
Tədbirdə Astara RİH-nin, Astara Rayon Polis Şöbəsinin, Lənkəran–Astara Regional Gənclər və İdman İdarəsinin Astara rayonu üzrə gənclər və idman sektorunun, “Astara Rayon Mərkəzi Xəstəxanası” Publik Hüquqi Şəxsin əməkdaşları çıxış ediblər.
Çıxış edənlər tədbirin məqsədinin sağlam həyat tərzinin təbliği və tərənnüm edilməsi olduğu qeyd edib, narkomaniyanın və erkən nikahların yaratdığı problemləri sadalayıb, gəncləri dəyərli tövsiyələrə əməl etməyə, narkomaniyaya düçar olmuş insanları doğru yola çəkməyə, onlara kömək etməyə çağırıblar.
Yekunda nümayəndələr tərəfindən məktəbli gənclərin sualları cavablandırılıb.
