Astara rayon Mərkəzi Kitabxanasında Lənkəran–Astara Regional Gənclər və İdman İdarəsinin təşkilatçılığı ilə “Erkən nikaha son deyək” və “Narkomaniya – əsrin bəlası” mövzularında maarifləndirici seminar keçirilib. Bu haqda məlumatı Cenublu.az bu gün, 8 may tarixində verir.
Tədbirdə orta məktəblərin yuxarı sinif şagirdləri, gənclər, kitabxana işçiləri, nümayəndələr olmaqla cəmi 55 nəfər iştirak edib.
Tədbirdə Astara RİH başçısının müavini – İctimai-siyasi və humanitar məsələlər şöbəsinin müdiri, Lənkəran–Astara Regional Gənclər və İdman İdarəsinin Astara rayonu üzrə gənclər və idman sektorunun müdiri, Astara Rayon Polis Şöbəsinin əməkdaşları, “Astara Rayon Mərkəzi Xəstəxanası” Publik Hüquqi Şəxsin həkimi iştirak ediblər.
Çıxışlarda sağlam həyat tərzinin təbliği və tərənnüm edilməsi, narkomaniyanın və erkən nikahların yaratdığı problemlər sadalanıb, gənclər dəyərli tövsiyələrə əməl etməyə, narkomaniyaya düçar olmuş insanları doğru yola çəkməyə, onlara kömək etməyə çağırılıblar.
Yekunda nümayəndələr tərəfindən məktəbli gənclərin sualları cavablandırılıb.
