Azərbaycan Milli Elmlər Akademiyasının (AMEA) Arxeologiya və Antropologiya İnstitutunun Astara ekspedisiyası Astara rayonunun Alaşa kəndi ərazisində yerləşən Əlişa qalasında növbəti arxeoloji qazıntı mövsümünə başlayıb.
Cenublu.az xəbər verir ki, tarix üzrə fəlsəfə doktoru Mikayıl Mustafayevin rəhbərlik etdiyi ekspedisiya qala divarlarının quruluşunu, müdafiə sistemini və qala daxilindəki memarlıq tikililərini araşdırır.
Qazıntılar zamanı qalanın müdafiə sisteminə aid yeni memarlıq elementləri, iri daşlardan və bişmiş kərpicdən inşa olunmuş qala divarları, su təchizatı sisteminə aid qurğular, saxsı su tüngləri, həmçinin sitadelin cənub hissəsində bişmiş kərpicdən tikilmiş günbəzli memarlıq quruluşu, oval formalı tikili və yonulmuş daş döşəmə aşkar edilib.
Alimlərin fikrincə, tapıntılar Astara bölgəsinin XII əsrin sonu - XIV əsrin əvvəllərində Səlcuq-İslam mədəni mühitinin mühüm mərkəzlərindən biri olduğunu göstərən vacib arxeoloji sübutlardır. Qazıntılar hazırda da davam etdirilir.
