Astara rayonu Ərçivan qəsəbəsində arvadını döyərək hadisə yerindən qaçan şəxsə hökm oxunub.
Hadisə 2025-ci il iyulun 23-də baş verib.
Həmin gün Cəmilə qızı Rəfiqə ilə dənizə getmək istədiyi üçün əri Seymura mesaj yazıb. Seymur isə buna etirazını bildirib, bundan sonra Cəmilə onu telefonunda bloka salıb.
Axşam saat 19:15-də Seymur evə gəlib və onlar dəhlizdə mübahisə etməyə başlayıblar. Bu zamanı o, Cəmiləni təhqir edib. Qadın isə boşanacağını deyib. Bundan sonra Seymur onu itələyib, ardınca saçlarından tutaraq yerə yıxıb, baş nahiyəsindən zərbələr vurub.
Cəmilə həmin vaxt qapıya tərəf qaçıb, çölə çıxanda təsadüfən onlara gələn qardaşı Aslan ilə rastlaşıb. Seymur isə Aslanı gördükdə pəncərədən atılaraq evdən uzaqlaşıb.
Daha sonra o, şikayət əsasında tutularaq cinayət məsuliyyətinə cəlb edilib.
Astara Rayon Məhkəməsinin qərarı ilə təqsirləndirilən şəxs Cinayət Məcəlləsinin 127.2.2-ci maddəsi ilə nəzərdə tutulmuş cinayət əməlini törətməkdə təqsirli bilinərək iki il müddətinə azadlıqdan məhrum edilib.
Qeyd edək ki, adlara şərtidir.
