Astara rayonunun Ərçivan qəsəbəsinin sakinlərini narahat edən ən böyük məsələlərdən biri örüş sahələrinin olmamasıdır. Bu haqda məlumatı Cenublu.az bu gün, 11 may tarixində ARB Media-ya istinadən verir.
Vətəndaşların sözlərinə görə, əvvəllər örüş sahələri çox böyük olsa da, hazırda o sahələr müəyyən şəxslərə satılıb. Bu səbəbdən iribuynuzlu heyvanlar yol kənarında otarılır.
“Mal-qaram yoxdur, saxlaya bilmirik, çünki saxlamağa yerimiz yoxdur”, – deyə sakinlərdən biri bildirib.
“Ərçivanda örüş sahələri elə yerlərə verilib ki, oraya mal-qaranı çıxarmaq üçün xüsusi texnikaha ehtiyac var. O vaxt xəritədə elə ayrılıb. Oraya mal-qaranın getməsi mümkün deyil. Qalan torpaqlar pay torpağı kimi vətəndaşlar arasında bölünüb. Ən yaxın örüş sahəsi “Bağ məhəllə” adlanan ərazidə yerləşir və sahəsi 5 hektardır. Qalan örüş sahələri 10-12 km uzaqlıqdadır”, – deyə Bələdiyyə sədri Mehman Quliyev qeyd edib.
