Astara rayon İcra Hakimiyyətinin başçısı Qəzənfər Ağayev növbəti səyyar qəbul-görüşünü Pəlikəş kəndində keçirib. Bu haqda məlumatı Cenublu.az bu gün, 14 iyul tarixində İcra Hakimiyyətinə istinadən verir.
Qəbul zamanı sakinlər kəndə təbii qaz xəttinin çəkilməsi, futbol meydançasının təmiri, yıxılmış ağaclardan tikinti materialı kimi istifadəyə icazənin verilməsi, Deqədi-Pəlikəş-Sım avtomobil yolunda yol nişanlarının qoyulmasına dair müraciətlər ediblər.
İcra başçısı öz növbəsində Pəlikəş-Sım kəndlərinə asfalt yolunun çəkildiyini bildirib və qaldırılan digər məsələlərin də tədricən həll olunacağını vurğulayıb. Həmçinin, o qeyd edib ki, son illər yaxın kəndlərin ərazisində yeni xəstəxana binası və 7 məktəb inşa edilib, yeni körpülər salınıb, elektrik xətt təsərrüfatında təmir işləri aparılıb, işığı və yolu olmayan Dolu, Diqo, Avyarud və Sibiyyət kəndlərinə elektrik xətti çəkiib və avtomobil yolu salınıb.
