Astara rayon Mərkəzləşdirilmiş Kitabxana Sisteminin komandası “Hər kitabı ünvanına” layihəsi çərçivəsində növbəti görüşünü Astara Rayon Məhkəməsində keçirib. Bu haqda məlumatı Cenublu.az bu gün, 22 iyul tarixində Lənkəran Regional Mədəniyyət İdarəsinə istinadən verir.
Layihə haqqında Mərkəzi kitabxananın şöbə müdiri Gülüstan Dadaşova rayon Məhkəməsinin hakimi və sədri Zamin İbrahimova və məhkəmə işçilərinə ətraflı məlumat verib.
Görüşdə kitabxana əməkdaşları məhkəmə işçilərinə “Məhkəmə hakimiyyəti... Hakim...Qanun...”, “Azərbaycan Respublikasının Cəzaların İcrası Məcəlləsi”, “Azərbaycan Respublikasının Cinayət Prosesi”, “Mühakimə və insan haqları”, “Məhkəmə hakimiyyəti: normativ-hüquqi aktlar toplusu”, “Vəkillər və vəkillik fəaliyyəti haqqında qanun”, “Müasir hüquqi problemlər”, Hegel “Hüquq fəlsəfəsi”, “Ümumi hüquq və dövlət nəzəriyyəsi” və s. kitabları təqdim ediblər.
Nümayiş olunmuş kitablar məhkəmə işçiləri tərəfindən böyük maraqla qarşılanmış, rayon Məhkəməsinin hakimi və sədri, əməkdaşları kitabxanaya üzv olublar.
