Astaradan olan Vətən müharibəsi qazisi Orxan Əlizadə ad günündə ailə həyatı qurub. Bu haqda məlumatı Cenublu.az bu gün, 16 iyul tarixində Azertac-a istinadən verir.
Qəhrəman qazimizin toyunda onun ailə üzvləri, silahdaşları, rayon rəsmiləri və ictimaiyyət nümayəndələri iştirak ediblər. Mərasim zamanı qazimizin şərəfli döyüş yolundan danışılıb və silahdaşları müharibə xatirələrini bölüşüblər.
Qeyd edək ki, qazi Orxan Natiq oğlu Əlizadə 14 iyul 1995-ci ildə Astara rayonunun Pensər kəndində anadan olub. 2000-2012-ci illərdə Pensər kənd 1 saylı tam orta məktəbdə orta təhsil alıb. 2013-2015-ci illərdə Naxçıvanda yerləşən "N" saylı hərbi hissədə xidmət edib. Vətən müharibəsi başlayanda könüllü olaraq ordu sıralarına yazılan Orxan 27 sentyabr 2020-ci ildə Füzuli istiqamətində gərgin döyüşlərə atılıb. Cəbrayıl, Qubadlı və Xocavənd rayonlarının düşmən işğalından azad olunmasında iştirak edib. 3 oktyabr tarixində Xocavənddə yanına düşən mərmi nəticəsində ağır yaralanıb. Sol gözünü itirən qəhrəmanımız Ali Baş Komandanın sərəncamları ilə "Cəsur döyüşçü", "Füzulinin azad olunmasına görə", "Qubadlının azad olunmasına görə" və "Cəbrayılın azad olunmasına görə" medalları ilə təltif olunub.
