Lənkəran rayonunda əlverişsiz hava arıçılıqda məhsuldarlığı aşağı salıb.
Bunu Lənkəranda damazlıq arıçılıq təsərrüfatının rəhbəri Səyavuş Yaqubov Dövlət Turizm Agentliyinin təşkil etdiyi mediatur zamanı jurnalistlərə açıqlamasında deyib.
Onun sözlərinə görə, cari ilin hava şəraiti arıçılıq məhsullarının həcminə mənfi təsir göstərib: "Builki mövsüm əlverişsiz keçib. May ayında havaların soyuq və yağmurlu olması səbəbindən müəyyən məhsulları yetərincə toplaya bilmədik. Xüsusilə propolisə tələbat çox olsa da, toplama qaydalarına ciddi riayət etdiyimiz üçün mövcud ehtiyatlar bazara çatdırılmağa kifayət etmir".
O bildirib ki, 2015-ci ildən fəaliyyət göstərən təsərrüfat çərçivəsində bir sıra uğurlu layihələr həyata keçirilib: " İqtisadiyyat Nazirliyinin tabeliyindəki Kiçik və Orta Biznesin İnkişafı Agentliyinin qrant müsabiqəsi qalibiyyəti və "Şəhərdən kəndə" layihəsi çərçivəsində Kənd Təsərrüfatı Nazirliyinin tabeliyindəki "Aqrar Tədarük və Təchizat" ASC ilə "PAŞA Holding"in maliyyə dəstəyi sayəsində Arıçılıq Muzeyi yaradılıb. Muzey Azərbaycana gələn turistlər və arıçılıqla maraqlananlar üçün maarifləndirici platforma rolunu oynayır".
S.Yaqubov qeyd edib ki, burada yalnız bal istehsalı ilə kifayətlənməyib apiterapiya, yəni arı məhsulları və arı havası ilə müalicə xidməti də təşkil olunub: "İnkişaf etmiş ölkələrin təcrübəsinə əsaslanaraq apiterapiya otağı və xüsusi pətəklər quraşdırmışıq. Eyni zamanda arı pətəyinin çəkisi, temperaturu və rütubətini SMS-lə məsafədən ötürən xüsusi "smart tərəzi" də hazırlanıb".
Mənbə: report
